Управување со правни ризици: правни трендови
18-19.10.2016, Хотел Александар Палас, Скопје

 


Instagram

Оваа конференција е создадена со цел да се поттикне развојот на управувањето со правните ризици, според нас, најважниот правен тренд кој ќе ја одбележи претстојната декада со неговата присутност во сите сфери на правниот живот.

Пред повеќе од 300 учесници, на 18 и 19 октомври во Скопје, во хотелот „Александар палас“, се одржа најголемиот правен настан во регионот – четвртата Меѓународна конференција за управување со правни ризици: правни трендови, во организација на Академик, на која говореа еминентни имиња од областа на правото и бизнисот.

Управувањето со правните ризици претставува тренд, но и иднина на правото и бизнисот и од тие причини за оваа мошне актуелна тема потребна е континуирана едукација, но не само од правен аспект, туку и од економски и социоекономски контекст, беше истакнато на Конференцијата. Поаѓајќи од тие постулати за успешно создавање на ефикасен систем за управување со правните ризици, конференциите на Академик претставуваат иновативен и исклучителен придонес во промоцијата и едукацијата за управувањето со правните ризици, а сè со цел да се развие поширока општествена свест за трендот кој ќе ја одбележи претстојната декада, особено во светот на правото и економијата.

Проф. д-р Кирил Чавдар, кој на овогодишната конференција на Академик доби признание за правна извонредност, истакна дека она што го прави Академик во однос на правната едукација на правниците има одлични резултати.

Потенцирајќи го значајниот едукативен и творечки влог на познатиот професор Чавдар во македонската правна теорија и практика, угледниот македонски адвокат Георги Димитров истакна дека  признанието на професорот му се доделува со најголема и искрена почит кон неговото дело кое е апел до помладите генерации.

Во својот воведен говор, адвокатот Димитров нагласи дека на Конференцијата покрај главниот тренд – управувањето со правните ризици, ќе се говори и за други трендови, како што се правните технологии, правниот дизајн, човечките ресурси, вклучувањето на талентираните правници во правните процеси, етиката и деловните процеси, правната сигурност и инвестициите.

Во таа насока, познатиот хрватски инвеститор Ненад Бакиќ на Конференцијата нагласи дека управувањето со правните ризици подразбира  градење на правна сигурност, која пак има големо влијание за инвеститорите и нивните одлуки.

Познатата словенечка адвокатка д-р Маја Менард, од адвокатската канцеларија „Улчар и партнери“, истакна дека едукацијата е клучна за работата со новите генерации талентирани правници и таа е гаранција за успех на долг рок.

Консултантот Џереми Хопкинс, од британската „Клеркингвел консалтинг“, на Конференцијата потенцираше дека тренд во светот е реномираните компании да вработуваат правници и да ангажираат адвокати заради својот углед и за сериозен пристап кон работата.

Улогата на правните консултанти во компаниите е фактор за успешното деловно-правно работење, истакна Карл Остринг, главен правен застапник и инвестициски менаџер во „АБ Тракшн“.

Покрај едукацијата и етичкиот кодекс, и усогласеноста на законите е неминовна потреба за компаниите со цел избегнување на правните ризици со коишто се соочуваат, рече Михаела Алберг, извршен директор за усогласеност со законите и со етичките норми во шведскиот телекомуникациски гигант „Телиасонера“.

Средената регулатива е суштинска за функционирањето на една медицинска установа, нагласи на Конференцијата познатиот македонски хирург  д-р Жан Митрев, основач и сопственик на Специјалната болница „Филип Втори“.

Реномираниот француски адвокат Филип Пенсол, управувачки партнер на париската канцеларија на Адвокатското друштво „Квин Емануел“ од Париз, Франција, подвлече дека при склучувањето на долгорочните договори мора јасно да се предвиди улогата на арбитрацијата и поставувањето на јасни клаузули.

Говорејќи за безбедноста на податоците, Маријана Винтијадис, управувачки директор во „Крол“, рече дека адвокатите секогаш се од посебен интерес за криминалците затоа што имаат и работат со многу доверливи информации.

Порака до адвокатите упати и грчкиот адвокат Константинос Корнилакис од „Кументакис и адвокати“, нагласувајќи дека инвестирањето во човечки ресурси е клучно за надминување на економската криза и нејзиното влијание врз работата на адвокатите.

На крајот од големиот правен настан, адвокатот  Георги Димитров упати искрена благодарност до предавачите и до учесниците на Конференцијата, истакнувајќи дека е вложено многу креативен труд и љубов во организирањето на големиот правен настан.

Учесниците и предавачите, понесувајќи одлични впечатоци од четвртата по ред Меѓународна конференција за управување со правни ризици, во организација на Академик, нагласија дека за нив претставувало огромно задоволство што биле дел од уникатната атмосфера, како и што биле дел од настан со импресивна организација и со инспиративна тема.

„Конференцијата создаде центар на светската правна мисла од главниот град на Македонија. Ова е фантастична Конференција со многу луѓе кои доаѓаат од различни области. Да се измешаат специјалностите на еден ваков собир е вистински успех. Импресионирани сме од сè. Сè е толку совршено организирано“, се само дел од импресиите на учесниците и на предавачите на Конференцијата.

Кликнете на галеријата и следете ги интервјуата со предавачите  на овогодишната конференција за да добиете целосни впечатоци.

За сите информации и сугестии, обратете се на: practicum@akademik.com.mk или на телефон: 02/3232-821; 02/3237-465.